សៀមរាប ៖ សម្ដេចនាយករដ្ឋមន្ត្រី ហ៊ុន សែន នៃរាជរដ្ឋាភិបាលកម្ពុជាបានបញ្ជាក់អះអាងនៅចំពោះមុខអ្នកចូលរួម ប្រមាណ១២០នាក់ មកពី៤២ប្រទេសថា «រាជរដ្ឋាភិបាលកម្ពុជាអបអរសាទរចំពោះមតិរបៀបណាក៏ដោយ លើកលែងតែវេទិកាដែលបញ្ចេញមតិញុះញង់ឲ្យមានសង្គ្រាម ឲ្យមានអំពើហិង្សា ឲ្យមានការប្រកាន់ពូជសាសន៍ ពណ៌សម្បុរ សាសនា ជនជាតិដែលច្បាប់ក៏ដូចជាសិទ្ធិមនុស្សហាមឃាត់» ។
សម្ដេចនាយករដ្ឋមន្ត្រីហ៊ុន សែន ក៏បានបង្ហាញនូវទស្សនៈរបស់ខ្លួនថា រូបលោកផ្ទាល់ «មិនចង់ឃើញអ្នកសារព័ត៌មានណាម្នាក់ជាប់គុកដោយសារការសរសេរអត្ថបទ ហើយរដ្ឋាភិបាលក៏មិនចង់ចំណាយប្រាក់កាក់ទៅលើការចិញ្ចឹមមនុស្សក្នុង ពន្ធនាគារបែបនោះដែរ ។ នេះជារឿងដែលយើងមិនចង់ឃើញ» ។
សម្ដេចនាយករដ្ឋមន្ត្រីហ៊ុន សែន បានថ្លែងបែបនេះ នៅក្នុងឱកាសថ្លែងបើកសិក្ខាសាលាក្រៅផ្លូវការលើកទី៨របស់ ASEM (កិច្ចប្រជុំអាស៊ីអឺរ៉ុប) ស្ដីពីសិទ្ធិមនុស្ស សេរីភាពការបញ្ចេញមតិដែលបានប្រព្រឹត្តធ្វើនៅសណ្ឋាគារសុខាអង្គរ ខេត្តសៀមរាប នាព្រឹកថ្ងៃទី២៧ខែកញ្ញានេះ ។
សម្ដេចនាយករដ្ឋមន្ត្រីហ៊ុន សែន បានមានប្រសាសន៍ថា សិទ្ធិមនុស្សនិងសេរីភាពនៃការបញ្ចេញមតិ សុទ្ធតែអាចកើតមាន មិនបាច់ប្រកាន់ស្ថានភាពក្រឬមាន របបនយោបាយ ជនជាតិសាសនានោះទេ ។ ក្នុងស្មារតីនេះសិទ្ធិ និងសេចក្ដីថ្លៃថ្នូររបស់មនុស្សមានជាប់នឹងខ្លួនមនុស្ស ហើយដែលគ្រប់គ្នាត្រូវតែគោរពការពារនិងអភិវឌ្ឍន៍សិទ្ធិនេះឲ្យ កាន់តែរីកចម្រើនធំធាត់ថែមទៀតស្របទៅនឹងសេចក្ដីត្រូវការរបស់ មនុស្ស ។ ជាការពិតទៅសេរីភាពនៃការបញ្ចេញមតិត្រូវបានគ្រប់មនុស្សគិតទាំង ប្រជាជនកម្ពុជាផង ចាត់ថាជាធាតុដ៏ចាំបាច់សម្រាប់ការទាក់ទងគ្នា និងសម្រាប់ការផ្ដល់យោបល់ទៅវិញទៅមក ដើម្បីធ្វើឲ្យសេរីភាពរស់នៅមានសេចក្ដីសុខ មានការរីកចម្រើននិងមានផលប្រយោជន៍ដូចៗគ្នា ។
សម្ដេចហ៊ុន សែន បានបង្ហាញថា កម្ពុជាបច្ចុប្បន្នមានអង្គការមិនមែនរដ្ឋាភិបាលប្រមាណជាង២.០០០ សារព័ត៌មានប្រមាណជិត៥០០ សុទ្ធតែមិនអាចត្រួតត្រាបានទេ ។ កម្ពុជាមានសមាគមអ្នកកាសែតប្រមាណ១៥អង្គការខុសៗគ្នា ។ ពួកគេទាំងអស់នោះកំពុងដំណើរការដោយសេរីក្នុងប្រទេសកម្ពុជា និងជាពិសេសការជួបប្រជុំនានាដើម្បីពិភាក្សាអំពីបញ្ហាសិទ្ធិ មនុស្ស គឺសុទ្ធតែជាសក្ខីភាពដ៏ប្រត្យក្សដែលឆ្លុះបញ្ចាំងអំពីឆន្ទៈមោះមុត ឥតងាករេរបស់រាជរដ្ឋាភិបាលក្នុងការលើកស្ទួយសិទ្ធិប្រជាធិបតេយ្យ និងការគោរពសិទ្ធិនិងសេចក្ដីថ្លៃថ្នូររបស់មនុស្សនៅក្នុងការ អនុវត្តន៍ជាក់ស្ដែង ។
សរុបមកកម្ពុជាមានឧបករណ៍ច្រើនយ៉ាងសម្រាប់ការបញ្ចេញមតិតាំងពី ការបោះពុម្ព ការផ្សាយតាមសំឡេង ការផ្សាយរូបភាព ការធ្វើបាតុកម្ម កូដកម្មរហូតដល់ការបោះឆ្នោត ។
លោកឱម យិនទៀង ប្រធានគណៈកម្មាធិការសិទ្ធិមនុស្សកម្ពុជាបានមានប្រសាសន៍ថា កិច្ចប្រជុំអាស៊ីអឺរ៉ុប ASEM បានជ្រើសរើសកម្ពុជាឲ្យធ្វើជាម្ចាស់ផ្ទះរៀបចំសិក្ខាសាលាក្រៅផ្លូវ ការលើកទី៨ ស្ដីពីសិទ្ធិមនុស្ស ក្រោមប្រធានបទ «សេរីភាពក្នុងការបញ្ចេញមតិ» ដែលសិក្ខាសាលានេះនឹងប្រព្រឹត្តទៅរយៈពេល៣ថ្ងៃ (ចាប់ពីថ្ងៃទី២៦ ដល់២៨ខែកញ្ញាឆ្នាំ២០០៧) នៅខេត្តសៀមរាប ។
ជាព្រឹត្តិការណ៍នយោបាយថ្មីមួយទៀតសម្រាប់ប្រទេសកម្ពុជា ដែលបានធ្វើជាម្ចាស់ផ្ទះរៀបចំសិក្ខាសាលាអន្តរជាតិមួយដែលមាន ប្រទេសចំនួន៤៣ចូលរួម ដែលក្នុងនោះរួមមានប្រទេសអឺរ៉ុបចំនួន២៧ប្រទេស និងមកពីអាស៊ីចំនួន១៦ប្រទេស ព្រមទាំងអ្នកសង្កេតការណ៍មកពីគណៈកម្មការអឺរ៉ុបនិងលេខាធិការអាស៊ាន មួយចំនួនទៀតដែលមានមនុស្សប្រមាណចំនួន១២០នាក់ ។
កិច្ចប្រជុំអាស៊ី - អឺរ៉ុប (ASEM) គឺជាវេទិកាលើកកម្ពស់កម្រិតនៃកិច្ចសហប្រតិបត្តិការនៃបណ្ដាប្រទេស នៅអាស៊ីនិងអឺរ៉ុប ដែលឆ្លុះបញ្ចាំងឡើងតាមរយៈដំណើរការដោយផ្អែកលើមូលដ្ឋាននៃកិច្ច ពិភាក្សាក្នុងគោលបំណងពង្រឹងការយោគយល់គ្នាទៅវិញទៅមករវាងតំបន់អាស៊ី និងអឺរ៉ុបការកសាងជំនឿទុកចិត្តនិងការជំរុញកិច្ចសហប្រតិបត្តិការ ក្នុងការអភិវឌ្ឍន៍សេដ្ឋកិច្ចនិងសង្គម ។
ក្នុងឱកាសនៃកិច្ចប្រជុំថ្នាក់រដ្ឋមន្ត្រី ASEM ក្នុងប្រទេសសិង្ហបុរីនាខែកុម្ភៈ ឆ្នាំ១៩៩៧ ប្រទេសស៊ុយអែត និងប្រទេសបារាំងបានលើកសំណើបង្កើតឲ្យមានការរៀបចំសិក្ខាសាលាក្រៅ ផ្លូវការស្ដីពីសិទ្ធិមនុស្សសម្រាប់ក្របខ័ណ្ឌ ASEM ។ គំនិតផ្ដួចផ្ដើមនេះត្រូវបានអនុម័តយល់ព្រមតាមរយៈកិច្ចពិភាក្សា ផ្នែកនយោបាយ និងសិទ្ធិមនុស្សដោយមានកិច្ចសហប្រតិបត្តិការ និងយោគយល់គ្នាទៅវិញទៅមករវាងអឺរ៉ុបនិងអាស៊ី ។ ហើយចាប់ពីឆ្នាំ១៩៩៧មក ASEM បានរៀបចំសិក្ខាសាលាស្ដីពីសិទ្ធិមនុស្សចំនួន៧លើករួចមកហើយ ។
លើកទី១ ត្រូវបានធ្វើនៅទីក្រុងលូដ (LUND) ប្រទេសស៊ុយអែតនៅខែធ្នូឆ្នាំ១៩៩៧ ក្រោមប្រធានបទ «ការទទួលបាននូវយុត្តិធម៌ ចំណុចពិសេសរបស់ជាតិ និងតំបន់ក្នុងការគ្រប់គ្រងផ្នែកយុត្តិធម៌ និងការលើកកម្ពស់ការគ្រប់គ្រងផ្នែកយុត្តិធម៌» ។ លើកទី៧ត្រូវប្រារព្ធធ្វើនៅទីក្រុងប៊ុយដាប៉េស (BUDAPEST) ប្រទេសហុងគ្រី នៅក្នុងខែកុម្ភៈ ឆ្នាំ២០០៦ ក្រោមប្រធានបទ «សិទ្ធិមនុស្សនិងជនជាតិភាគតិច ភាសានិងសាសនានៃជនជាតិភាគតិច» ។
សិក្ខាសាលាក្រៅផ្លូវការ របស់ ASEM លើកទី៨ស្ដីពីសិទ្ធិមនុស្សនឹងពិភាក្សាអំពីប្រធានបទក្រោមចំណង ជើងថា «សេរីភាពក្នុងការបញ្ចេញមតិ» ដូចមានចែងក្នុងមាត្រា១៩ នៃសេចក្ដីថ្លែងការណ៍ជាសកលស្ដីពីសិទ្ធិមនុស្ស «មនុស្សគ្រប់រូបមានសិទ្ធិសេរីភាពក្នុងការមានមតិនិងការសម្ដែង មតិ» ។ សិទ្ធិនេះរាប់បញ្ចូលទាំងសេរីភាពក្នុងការប្រកាន់មតិដោយគ្មានការ ជ្រៀតជ្រែកនិងសេរីភាពក្នុងការស្វែងរកការទទួលនិងការផ្សព្វផ្សាយ ព័ត៌មាន និងគំនិតនានាដោយគ្មានព្រំដែន ទោះតាមរយៈមធ្យោបាយណាមួយក៏ដោយ ៕
No comments:
Post a Comment